KLSH: Rreth 500 mijë euro për siguracionin e anëtarëve të KPK-së, pothuajse të gjitha tenderat fituar nga “Sigal”
Kontrolli i Lartë i Shtetit raporton se për siguracionin e jetës dhe shëndetit të anëtarëve e punonjësve të KPK-së janë kontraktuar mbi 46 milionë lekë, kryesisht me kompaninë "Sigal".
Kontrolli i Lartë i Shtetit (KLSH) ka evidentuar se për siguracionin e jetës dhe shëndetit në Komisionin e Pavarur të Kualifikimit (KPK) janë kontraktuar rreth 46,5 milionë lekë pa TVSH, afërsisht 500 mijë euro.
Shifra buron nga Auditi i Përputhshmërisë i KLSH-së në KPK, shkalla e parë e Vetingut. Sipas raportit, vlera totale e kontraktuar për komisionerët, personat e lidhur me ta, këshilltarët dhe punonjësit është 46.464.536 lekë pa TVSH.
Tenderat pa garë
Sipas analizave të përmendura në raport, pothuajse të gjitha procedurat për siguracionin e anëtarëve janë fituar nga një kompani e vetme, “Sigal”.
Dokumentet zyrtare të tenderave tregojnë se procedurat e fituara nga “Sigal” për strukturat e Vetingut janë zhvilluar pa garë dhe janë sinjalizuar me “flamurin e kuq”.
Mbulim edhe për dhëmbët
KPK-ja u formalizua në vitin 2017 dhe funksionoi deri në vitin 2024, me detyrë rivlerësimin kalimtar të gjyqtarëve dhe prokurorëve. Për shkak të rolit të tyre, ligji parashikonte siguracion gjithëpërfshirës për jetën dhe shëndetin e anëtarëve.
Procedurat për 12 anëtarët e komisionit përfshinin mbulim shpenzimesh edhe për probleme stomatologjike, gjë që sipas burimit nuk dukej e arsyeshme të përballohej nga shteti.
