Qytetari denoncon Raiffeisen Bank: Më janë tërhequr 7 mijë euro pa autorizim, 4 mijë nuk m’i kthyen

Një qytetar ka denoncuar publikisht Raiffeisen Bank, duke pretenduar se nga llogaria e tij janë tërhequr pa autorizim shuma parash në dy raste të ndryshme dhe se banka nuk ia ka rimbursuar të gjithë dëmin. Denoncimi u bë përpara degës së bankës në zonën e Komunës së Parisit në Tiranë.

Në të njëjtën kohë, në këtë filial policia kryente veprime hetimore për një grabitje me armë të raportuar më herët.

Qytetari tha se fillimisht kishte vënë re mungesën e 23 eurove nga llogaria. Sipas tij, pasi njoftoi punonjësit e bankës, iu premtua se shuma do t’i kompensohej.

Ai pretendon se disa muaj më vonë nga llogaria iu morën edhe 7 mijë euro. Banka, sipas tij, i ktheu 3 mijë euro, ndërsa 4 mijë eurot e tjera nuk i janë rimbursuar.

Qytetari tha se prej dy vitesh përpiqet t’i marrë paratë e mbetura, por pa rezultat. Ai shtoi se punonjësit e filialit nuk e lejojnë më të hyjë në ambientet e bankës.

“Këtu më kanë vjedhur mua llogarinë time… Më kompensuan 3 mijë euro, më thanë do të kompensojmë edhe 4 mijë euro. Ku janë paratë? Kam dy vjet që vij vërdallë”, deklaroi ai.

I revoltuar, ai tha se ka kërkuar zgjidhje edhe pranë institucioneve të drejtësisë, por nuk ka marrë përgjigje. “Shkoj te drejtësia, drejtësia ngre duart lart”, u shpreh ai për “Syri Tv”.

Qytetari paralajmëroi se do t’u bashkohet protestave, duke e lidhur vendimin me pakënaqësinë ndaj mënyrës se si, sipas tij, po trajtohet ankesa e tij.