Pas largimit të deputetëve nga protesta, Berisha mbështet studentët dhe akuzon Qorin e Ramën për përçarje

Kryetari i Partisë Demokratike, Sali Berisha, ka reaguar me një deklaratë pas protestës së së shtunës në Tiranë, ku studentët nuk e pranuan praninë e deputetëve të PD-së dhe kërkuan largimin e tyre nga tubimi.

Berisha u shpreh mirënjohës ndaj studentëve dhe gjimnazistëve për qëndrimin e tyre përballë ndërhyrjes së Policisë. Ai përsëriti kërkesën për dorëheqjen e kryeministrit Edi Rama dhe për krijimin e një qeverie kujdestare, që sipas tij do të garantonte zgjedhje të lira e të ndershme.

“Trimëria, vendosmëria e studentëve të revoltuar dhe gjimnazistëve mposhti në të gjitha rastet sulmet e egra të narkobanditëve”, tha Berisha.

Ai ftoi çdo qytetar dhe forcat politike të bashkohen në mbështetje të revoltës studentore.

Akuza ndaj Qorit dhe Ramës

Pjesa më e ashpër e deklaratës lidhej me largimin e deputetëve demokratë. Berisha pretendoi se pas kësaj qëndronte një përpjekje e Ramës për të përçarë protestën dhe drejtoi gishtin nga aktivistët e Arlind Qorit, kreut të Lëvizjes Bashkë, të cilët i quajti “Jago të revoltës studentore”.

Ai pretendoi gjithashtu se në këtë përpjekje ishin përfshirë persona të angazhuar nga Policia, që sipas tij “morën përgjigjen e merituar”.

Të rinjtë kundërshtuan praninë e përfaqësuesve të PD-së, me kërkesën që tubimi të mbetet studentor dhe të mos kthehet në aktivitet partiak.