Nxënës të gjimnazit “Naim Frashëri” të Durrësit ndalohen për orë nga policia në Kotor

Një autobus dhe një furgon me nxënës të gjimnazit “Naim Frashëri” në Durrës, që po realizonin një udhëtim turistik në Mal të Zi, u ndaluan nga policia në qytetin e Kotorit. Në mjete ishin nxënës të mitur dhe mësues shoqërues, të cilët u mbajtën për disa orë në ambientet e policisë.

Fillimisht familjarëve nuk iu bë e ditur arsyeja e ndalimit. Ata kërkuan ndihmën e Ambasadës Shqiptare në Mal të Zi dhe të institucioneve arsimore në Durrës.

Më pas u mor një informacion tjetër, sipas të cilit ndalimi dyshohet se lidhet me një incident ku janë përfshirë disa nxënës. Sipas këtij pretendimi, tre prej tyre kanë bërë gjestin e shqiponjës me duar, ndërsa një nxënës tjetër dyshohet se është përfshirë në një përplasje me një grua malazeze, e cila ka njoftuar policinë.

Sipas informacioneve të fundit, pjesa më e madhe e grupit është larguar nga komisariati dhe është nisur drejt hotelit. Katër nxënës dhe një mësuese raportohet se vazhdojnë të jenë në ambientet e policisë në Kotor.

Deri tani nuk ka konfirmim zyrtar për rrethanat e incidentit dhe arsyen e saktë të ndalimit. Kërkohet reagim nga Ambasada Shqiptare në Mal të Zi, Ministria për Evropën dhe Punët e Jashtme, autoritetet policore malazeze dhe Drejtoria Arsimore në Durrës, për të sqaruar çfarë ndodhi dhe pse të miturit u mbajtën kaq gjatë.