Avokati i Veliajt kërkon ndërhyrjen e drejtorit të burgut të Fierit pas refuzimit të dytë për takim

Avokati Plarent Ndreca, mbrojtësi i kryebashkiakut të Tiranës, Erion Veliaj, pretendon se i është refuzuar për herë të dytë hyrja në burgun e Fierit, ku Veliaj ndodhet në paraburgim, për të zhvilluar një takim me klientin e tij. Ai i ka dërguar një shkresë drejtuesit të institucionit.

Sipas Ndrecës, ky pengim cenon të drejtën për mbrojtje dhe ushtrimin e detyrës së tij si avokat. Ai i referohet nenit 51 të ligjit, që sipas tij i garanton avokatit të drejtën për t’u takuar me klientin në çdo kohë.

Avokati paralajmëron se, nëse situata nuk zgjidhet, do t’i drejtohet oficerit të policisë gjyqësore për të paraqitur kallëzim penal për shpërdorim detyre ndaj punonjësve që, sipas tij, janë përgjegjës për pengimin e takimit. Ai i kërkon drejtorit të burgut të ndërhyjë menjëherë për të garantuar zbatimin e ligjit.

Ndreca thekson se nuk ka pasur qëllim ta përshkallëzojë apo ta bëjë publike çështjen, por se përsëritja e pengesës e detyron të ndjekë rrugën ligjore. Në letër ai shkruan: “Është hera e dytë që përsëritet e njëjta situatë. Edhe sot po pengohem të hyj në institucion dhe të takohem me klientin tim.”

“Respektimi i ligjit nuk është çështje vullneti apo diskrecioni të punonjësve të institucionit. Është detyrim!”

Sipas avokatit, e drejta e mbrojtjes nuk mund të varet nga vullneti apo interpretimi i punonjësve të burgut.