Gentian Sula, nën akuzë nga SPAK, drejton bashkimin që ndërton spitalin e IEVP-së në Shënkoll
Një bashkim operatorësh me në krye "Agi Kons" është shpallur fitues për ndërtimin e spitalit për të sëmurët me mjekim të detyruar në Shënkoll. Pronari i kompanisë, Gentian Sula, akuzohet nga SPAK në dosjen "Veliaj".
Bashkimi i operatorëve i drejtuar nga kompania “Agi Kons” ka fituar tenderin për ndërtimin e godinës së spitalit për personat me mjekim të detyruar me vendim gjykate në IEVP Shënkoll, në Lezhë. Pronari i kompanisë, Gentian Sula, akuzohet nga Prokuroria e Posaçme për “korrupsion aktiv të të zgjedhurve vendorë” në dosjen ndaj kryebashkiakut të arrestuar të Tiranës, Erion Veliaj.
Për këtë vepër, të parashikuar nga neni 245 i Kodit Penal, ligji vendos dënim nga një deri në pesë vjet burg. Sula rrezikon këtë dënim vetëm nëse gjykata konfirmon provat e Prokurorisë së Posaçme.
Rezultatet e procedurës i shpalli pak ditë më parë Operatori i Blerjeve të Përqendruara. Fondi limit ishte 1 miliard lekë të reja, rreth 11.4 milionë euro. Fitues u shpall grupi i përbërë nga “Agi Kons”, “Colombo” dhe “Deha”, me ofertën 786.717.225 lekë të reja. Më parë Operatori kishte skualifikuar katër kompani të tjera, që kishin paraqitur ofertë më të ulët. Sipas autoritetit kontraktor, ato nuk plotësonin kriteret kualifikuese.
“Agi Kons” është regjistruar në vitin 2002 dhe prej shumë vitesh ka qenë në pronësi të Gentian Sulës si individ. Në dhjetor 2024 aksionet iu kaluan shoqërisë “UK Development Holding Limited”, të regjistruar në Britaninë e Madhe. Nga dokumentet në Qendrën Kombëtare të Biznesit rezulton se pronar fundor mbetet përsëri Sula. Akti thotë se ortaku i vetëm miratoi shkëmbimin e kuotës me shoqërinë angleze, në vlerë 12.652.449 paundë, kundrejt 100% të kapitalit prej 1.501.000.000 lekësh.
SPAK thotë se Sula ka tentuar të fshehë një apartament të padeklaruar, në pronësi reale të Erion Veliajt. Sipas prokurorëve, Sula ka hyrë në marrëdhënie korruptive me kryebashkiakun, në këmbim të lejeve të ndërtimit nga bashkia.
Prokuroria thotë se fillesa e zbulimit të apartamentit ishte një dollap. Mobilieri Arlind Kodra kishte në kompjuter të dhëna për punime për Ajola Xoxen, në shtëpinë në Kodër të Diellit dhe në një vilë në Qerret, ku një shënim titullohej “kati lart”. Ai ka deklaruar se në vitin 2021 Ajola e çoi në një apartament mbi banesën e saj dhe se ndërtoi vetëm një dollap.
Më 14 prill 2025, agjentët e Byrosë Kombëtare të Hetimit kontrolluan apartamentin në katin e pestë, mbi banesën e Xoxes dhe Veliajt. Kur iu treguan fotot, Kodra tha se dollapi ishte ai që kishte bërë. Në mesazhet e sekuestruara mes Ajolës dhe arkitektit Olsi Eftimi flitej për shkallë të brendshme që do të lidhnin dy apartamentet. Eftimi ka pranuar se shkoi në apartament, por vetëm për rregullime, pasi pikonte ujë në tavan. SPAK thotë se ka të dhëna të tjera që e bëjnë apartamentin pasuri të fshehur të Veliajt dhe Xoxes.
