Arrestohet Marko Kriçak, shefi i Policisë Kriminale të Serbisë, për shpërdorim detyre
Drejtuesi i Drejtorisë së Policisë Kriminale në Serbi u arrestua të dielën me urdhër të Prokurorisë së Lartë Publike në Beograd. Dyshohet se ka ndërhyrë në hetimin për vrasjen e Aleksandar Neshoviçit.
Marko Kriçak, drejtuesi i Drejtorisë së Policisë Kriminale në Serbi, u arrestua në mëngjesin e së dielës me urdhër të Prokurorisë së Lartë Publike në Beograd, i dyshuar për shpërdorim detyre. Deri dje ai radhitej mes drejtuesve policorë që presidenti Aleksandar Vuçiç i kishte vlerësuar publikisht.
Arrestimi lidhet me hetimin për vrasjen e Aleksandar Neshoviçit, i njohur si Baja, i cili u vra në restorantin “27” në zonën e Senjakut në Beograd. Sipas medieve serbe, Kriçak dyshohet se ka ndërhyrë në procesin hetimor, duke falsifikuar prova dhe duke bërë presion mbi dëshmitarët dhe personat e akuzuar, me synimin që hetimi të orientohej drejt një versioni të paracaktuar.
Procedimi ndaj tij nisi pas një kallëzimi penal të paraqitur nga avokati i Veselin Miliçit, ndihmësdrejtor i Policisë së Serbisë.
Kriçak e mori drejtimin e Policisë Kriminale në fund të dhjetorit 2025. Më parë kishte udhëhequr Njësinë për Sigurinë e Personave dhe Objekteve të Caktuara (JZO), e cila është përmendur shpesh në raportime për përdorim të dyshuar të dhunës ndaj protestuesve. Me emërimin e tij në krye të Policisë Kriminale, nën autoritetin e tij kaloi edhe Shërbimi për Luftën kundër Krimit të Organizuar (SBPOK), që bashkëpunon ngushtë me Prokurorinë për Krimin e Organizuar.
Karriera e tij nisi në Agjencinë e Sigurisë dhe Informacionit (BIA), para se të kalonte në Ministrinë e Brendshme. Pas emërimit të Bratislav Gashiçit ministër i Policisë, u bë zëvendëskomandant i JZO-së, ndërsa në vitin 2023 mori drejtimin e saj. Sipas “Danas”, ai kaloi nga BIA në polici pa trajnimin bazë policor, gjë që ligji serb e lejon. Opozita dhe disa gazetarë kishin pretenduar se para BIA-s kishte punuar si shitës automjetesh, por Ministria e Brendshme i hodhi poshtë këto pretendime.
Emri i tij është shfaqur edhe në episode të debatueshme gjatë protestave studentore. Studentja Nikolina Sinxheliç ka deklaruar publikisht se Kriçak e kërcënoi me përdhunim dhe e goditi me shuplakë pasi ajo u shoqërua në garazhin e ndërtesës së Qeverisë. Ajo paraqiti kallëzim penal ndaj tij dhe disa efektivëve të tjerë, por sipas “Danas” hetimi nuk eci dukshëm përpara, ndërsa Kriçak ka ngritur padi private kundër saj.
Një tjetër rast lidhet me një video ku Kriçak dyshohet se ushtron dhunë fizike dhe e detyron një student të ndaluar në një protestë në Jagodinë të japë deklaratë. Emri i tij përmendet edhe në çështjen e inspektorëve Milenkoviç dhe Mitiç, të cilët ruhen nga Njësia Speciale Antiterroriste për shkak të informacioneve mbi një kërcënim ndaj jetës së tyre. Sipas raportimeve, Ministria e Brendshme kishte propozuar që mbrojtja t’i besohej JZO-së, por të dy inspektorët e refuzuan.
Vuçiç e kishte përmendur disa herë pozitivisht Kriçakun dhe kishte dekoruar si atë, ashtu edhe njësinë që ai drejtonte më parë. Arrestimi dhe dyshimet ndaj tij nuk përbëjnë vendim fajësie, ndërsa përgjegjësinë penale do ta përcaktojnë organet e drejtësisë.
