Policia: 6 të arrestuar pas përplasjeve në protestën në Tiranë, një nga veprat penale është vrasja e policit në tentativë
Policia arrestoi gjashtë persona, procedoi penalisht tre të tjerë dhe shpalli në kërkim dy pas dhunës në protestën e djeshme në Tiranë. Materialet iu referuan Prokurorisë edhe për "Vrasjen e punonjësit të Policisë" në tentativë.
Policia e Shtetit ka arrestuar gjashtë persona për dhunën e ushtruar gjatë protestës së djeshme në Tiranë. Tre persona të tjerë janë procedur penalisht në gjendje të lirë, ndërsa dy janë shpallur në kërkim.
Sipas Policisë, protestuesit kanë goditur efektivët me sende të forta, lëndë piroteknike, bomba molotov, sfera dhe vida metalike. Ata kanë bllokuar edhe qarkullimin dhe kanë djegur kazanë mbeturinash. Gjatë kontrolleve janë sekuestruar bomba molotov.
Të arrestuarit janë Sh., 26 vjeç, L. K., 18 vjeç, F. Ç., 38 vjeç, dhe K. R., 35 vjeç, shtetas i huaj, si dhe dy të mitur. Sipas njoftimit, bombat molotov u janë gjetur shtetasve L. K. dhe A. Sh.
Veprimet hetimore janë kryer nën drejtimin e Prokurorisë. Specialistët për Hetimin e Krimit vijojnë dokumentimin e plotë të veprimeve të kundërligjshme, identifikimin e personave të tjerë të përfshirë dhe vënien e tyre përpara përgjegjësisë ligjore.
Materialet procedurale iu referuan Prokurorisë për veprën penale “Vrasja e punonjësit të Policisë”, e mbetur në tentativë. Të tjerat janë “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Kundërshtimi i punonjësit të Policisë së rendit publik” dhe “Shkelja e rregullave mbi lëndët plasëse dhe djegëse”.
Në listë janë edhe “Pengimi i qarkullimit të mjeteve të transportit”, “Shkatërrimi i pronës me zjarr” dhe “Mbajtja pa leje dhe prodhimi i armëve shpërthyese dhe i municionit”.
